শ্ৰদ্ধাত্ৰয়বিভাগযোগ

অৰ্জুন উবাচ |

য়ে শাস্ত্ৰবিধিমুৎসৃজ্য যজন্তে শ্রদ্ধয়ান্বিতাঃ |

তেষাং নিষ্ঠা তু কা কৃষ্ণ সত্ত্বমাহো রজস্তমঃ ||১৭-১||

শ্ৰীভগৱানুবাচ |

ত্ৰিবিধা ভৱতি শ্রদ্ধা দেহিনাং সা স্বভাৱজা |

সাত্ত্বিকী ৰাজসী চৈৱ তামসী চেতি তাং শৃণু ||১৭-২||

সত্ত্বানুরূপা সৰ্বস্য শ্রদ্ধা ভৱতি ভাৰত |

শ্রদ্ধাময়োঽয়ং পুরুষো যো যচ্ছ্রদ্ধঃ স এৱ সঃ ||১৭-৩||

যজন্তে সাত্ত্বিকা দেৱান্যক্ষৰক্ষাংসি ৰাজসাঃ |

প্রেতান্ভূতগণাংশ্চান্যে যজন্তে তামসা জনাঃ ||১৭-৪||

অশাস্ত্ৰৱিহিতং ঘোৰং তপ্যন্তে যে তপো জনাঃ |

দম্ভাহংকাৰসংযুক্তাঃ কামৰাগবলান্বিতাঃ ||১৭-৫||

কৰ্ষয়ন্তঃ শৰীৰস্থং ভূতগ্ৰামমচেতসঃ |

মাং চৈৱান্তঃশৰীৰস্থং তান্বিদ্ধ্যাসুৰনিশ্চয়ান্ ||১৭-৬||

আহাৰস্ত্বপি সৰ্বস্য ত্ৰিৱিধো ভৱতি প্ৰিয়ঃ |

যজ্ঞস্তপস্তথা দানং তেষাং ভেদমিমং শৃণু ||১৭-৭||

আয়ুঃসত্ত্ববলাৰোগ্যসুখপ্ৰীতিৱিৱৰ্ধনাঃ |

ৰস্যাঃ স্নিগ্ধাঃ স্থিৰা হৃদ্যা আহাৰাঃ সাত্বিকপ্ৰিয়াঃ ||১৭-৮||

কট্বম্ললৱণাত্যুষ্ণতীক্ষ্ণৰূক্ষৱিদাহিনঃ |

আহাৰা ৰাজসস্যেষ্টা দুঃখশোকাময়প্ৰদাঃ ||১৭-৯||

যাতয়ামং গতৰসং পূতি পৰ্যুষিতং চ যৎ |

উচ্ছিষ্টমপি চামেধ্যং ভোজনং তামসপ্ৰিয়ম্ ||১৭-১০||

অফলাঙ্ক্ষিভিৰ্যজ্ঞো ৱিধিদৃষ্টো য ইজ্যতে |

যষ্টৱ্যমেৱেতি মনঃ সমাধায় স সাত্বিকঃ ||১৭-১১||

অভিসন্ধায় তু ফলং দম্ভাৰ্থমপি চৈৱ যৎ |

ইজ্যতে ভৰতশ্রেষ্ঠ তং যজ্ঞং ৱিদ্ধি ৰাজসম্ ||১৭-১২||

ৱিধিহীনমসৃষ্টান্নং মন্ত্ৰহীনমদক্ষিণম্ |

শ্রদ্ধাৱিৰহিতং যজ্ঞং তামসং পৰিচক্ষতে ||১৭-১৩||

দেৱদ্বিজগুৰুপ্ৰাজ্ঞপূজনং শৌচমাৰ্জৱম্ |

ব্ৰহ্মচৰ্যমহিংসা চ শাৰীৰং তপ উচ্যতে ||১৭-১৪||

অনুদ্বেগকৰং ৱাক্যং সত্যং প্ৰিয়হিতং চ যৎ |

স্বাধ্যায়াভ্যসনং চৈৱ ৱাঙ্ময়ং তপ উচ্যতে ||১৭-১৫||

মনঃ প্ৰসাদঃ সৌম্যৎৱং মৌনমাত্মৱিনিগ্ৰহঃ |

ভাৱসংশুദ്ധിৰিত্যএতত্তপো মানসমুচ্যতে ||১৭-১৬||

শ্রদ্ধয়া পৰয়া তপ্তং তপস্তত্ত্ৰিৱিধং নৰৈঃ |

অফলাকাঙ্ক্ষিভিৰ্যুক্তৈঃ সাত্বিকং পৰিচক্ষতে ||১৭-১৭||

সৎকাৰমানপূজাৰ্থং তপো দম্ভেন চৈৱ যৎ |

ক্ৰিয়তে তদিহ প্ৰোক্তং ৰাজসং চলমধ্ৰুৱম্ ||১৭-১৮||

মূঢ়গ্ৰাহেণাত্মনো যৎপীড়য়া ক্ৰিয়তে তপঃ |

পৰস্যোৎসাধনর্থং ৱা তত্তামসমুদাহৃতম্ ||১৭-১৯||

দাতৱ্যমিতি যদ্দানং দীয়তেঽনুপকাৰিণ | |

দেশে কালে চ পাত্ৰে চ তদ্দানং সাত্বিকং স্মৃতম্ ||১৭-২০||

যত্তু প্ৰত্যুপকাৰাৰ্থং ফলমুদ্দিশ্য ৱা পুনঃ |

দীয়তে চ পৰিক্লিষ্টং তদ্দানং ৰাজসং স্মৃতম্ ||১৭-২১||

অদেশকালে যদ্দানমপাত্ৰেভ্যশ্চ দীয়তে |

অসৎকৃতমৱজ্ঞাতং তত্তামসমুদাহৃতম্ ||১৭-২২||

ওঁতৎসদিতি নিৰ্দেশো ব্ৰহ্মণস্ত্ৰিৱিধঃ স্মৃতঃ |

ব্ৰাহ্মণাস্তেন ৱেদাশ্চ যজ্ঞাশ্চ ৱিহিতাঃ পুৰা ||১৭-২৩||

তস্মাদোমিত্যুদাহৃত্য যজ্ঞদানতপঃক্ৰিয়াঃ |

প্ৰৱৰ্তন্তে ৱিধানোক্তাঃ সততং ব্ৰহ্মৱাদিনাম্ ||১৭-২৪||

তদিত্যনভিসন্ধায় ফলং যজ্ঞতপঃক্ৰিয়াঃ |

দানক্ৰিয়াশ্চ ত্ৰিৱিধাঃ ক্ৰিয়ন্তে মোক্ষকাঙ্ক্ষিভিঃ ||১৭-২৫||

সদ্ভাৱে সাধুভাৱে চ সদিত্যএতৎপ্ৰয়ুজ্যতে |

প্ৰশস্তে কৰ্মণি তথা সচ্ছব্দঃ পাৰ্থ যুজ্যতে ||১৭-২৬||

যজ্ঞে তপসি দানে চ স্থিতিঃ সদিতি চোচ্যতে |

কৰ্ম চৈৱ তদৰ্থীয়ং সদিত্যৈৱাভিধীয়তে ||১৭-২৭||

অশ্রদ্ধয়া হুতং দত্তং তপস্তপ্তং কৃতং চ যৎ |

অসদিত্যুচ্যতে পাৰ্থ ন চ তৎপ্ৰেত্য নো ইহ ||১৭-২৮||