ৰাজবিদ্যা ৰাজগুহ্যযোগ

শ্ৰীভগৱানুবাচ |

ইদং তু তে গুহ্যতমং প্ৰবক্ষ্যাম্যনসূয়ৱে |

জ্ঞানং বিজ্ঞানসহিতং যজ্জ্ঞাত্বা মোক্ষ্যসেঽশুভাত্ ||৯-১||

ৰাজবিদ্যা ৰাজগুহ্যং পৱিত্ৰমিদমুত্তমম্ |

প্ৰত্যক্ষাবগমং ধৰ্ম্যং সুসুখং কৰ্তুমৱ্যয়ম্ ||৯-২||

অশ্ৰদ্দধানাঃ পুৰুষা ধৰ্মস্যাস্য পৰন্তপ |

অপ্ৰাপ্য মাং নিৱৰ্তন্তে মৃত্যুসংসাৰৱৰ্ত্মনি ||৯-৩||

ময়া ততমিদং সৰ্বং জগদৱ্যক্তমূৰ্তিনা |

মৎস্থানি সৰ্বভূতানি ন চাহং তেষ্বৱস্থিতঃ ||৯-৪||

ন চ মৎস্থানি ভূতানি পশ্য মে যোগমৈশ্বৰম্ |

ভূতভৃন্ন চ ভূতস্থো মমাত্মা ভূতভাৱনঃ ||৯-৫||

যথাকাশস্থিতো নিত্যং বায়ুঃ সৰ্বত্ৰগো মহান্ |

তথা সৰ্ৱাণি ভূতানি মৎস্থানীত্যুপধাৰয় ||৯-৬||

সৰ্বভূতানি কৌন্তেয় প্ৰকৃতিং যান্তি মামিকাম্ |

কল্পক্ষয়ে পুনস্তানি কল্পাদৌ বিসৃজাম্যহম্ ||৯-৭||

প্ৰকৃতিং স্বামৱষ্টভ্য বিসৃজামি পুনঃ পুনঃ |

ভূতগ্ৰামমিমং কৃৎস্নমৱশং প্ৰকৃতেৰ্ৱশাৎ ||৯-৮||

ন চ মাং তানি কৰ্ম্মাণি নিবধ্নন্তি ধনঞ্জয় |

উদাসীনৱদাসীনমসক্তং তেষু কৰ্ম্মসু ||৯-৯||

ময়াধ্যক্ষেণ প্ৰকৃতিঃ সূয়তে সচৰাচৰম্ |

হেতুনানেন কৌন্তেয় জগদ্বিপৰিবৰ্ততে ||৯-১০||

অৱজানন্তি মাং মূঢ়া মানুষীং তনুমাশ্ৰিতম্ |

পৰং ভাৱমজানন্তো মম ভূতমহেশ্বৰম্ ||৯-১১||

মোঘাশা মোঘকৰ্ম্মাণো মোঘজ্ঞানা ৱিচেতসঃ |

ৰাক্ষসীমাসুৰীং চৈৱ প্ৰকৃতিং মোহিনীং শ্ৰিতাঃ ||৯-১২||

মহাত্মানস্তু মাং পাৰ্থ দৈৱীং প্ৰকৃতিমাশ্ৰিতাঃ |

ভজন্ত্যনন্যমনসো জ্ঞাত্বা ভূতাদিমৱ্যয়ম্ ||৯-১৩||

সততং কীৰ্তয়ন্তো মাং যতন্তশ্চ দৃঢ়ব্ৰতাঃ |

নমস্যন্তশ্চ মাং ভক্ত্যা নিত্যযুক্তা উপাসতে ||৯-১৪||

জ্ঞানযজ্ঞেন চাপ্যন্যে যজন্তো মামুপাসতে |

একত্বেন পৃথক্ত্বেন বহুধা বিশ্বতোমুখম্ ||৯-১৫||

অহং ক্ৰতুৰহং যজ্ঞঃ স্বধাহমহমৌষধম্ |

মন্ত্ৰোঽহমহমেৱাজ্যমহমগ্নিলহং হুতম্ ||৯-১৬||

পিতাঽহমস্য জগতো মাতা ধাতা পিতামহঃ |

ৱেদ্যং পৱিত্ৰমঙ্কাৰ ঋকসাম যজুৰেৱ চ ||৯-১৭||

গতিৰ্ভৰ্তা প্ৰভুঃ সাক্ষী নিৱাসঃ শৰণং সুহৃৎ |

প্ৰভৱঃ প্ৰলয়ঃ স্থানং নিধানং বীজমৱ্যয়ম্ ||৯-১৮||

তপাম্যহমহং বৰ্ষং নিগৃহ্ণাম্যুৎসৃজামি চ |

অমৃতং চৈৱ মৃত্যুশ্চ সদসচ্চাহমৰ্জুন ||৯-১৯||

ত্ৰৈৱিদ্যা মাং সোমপাঃ পূতপাপা

যজ্ঞৈৰিষ্ট্বা স্বৰ্গতিং প্ৰাৰ্থয়ন্তে |

তে পুণ্যমাসাদ্য সুৰেন্দ্ৰলোক-

মশ্নন্তি দিব্যান্দিৱি দেৱভোগান্ ||৯-২০||

তে তং ভুক্ত্বা স্বৰ্গলোকং ৱিশালং

ক্ষীণে পুণ্যে মৰ্ত্যলোকং ৱিশন্তি |

এৱং ত্ৰয়ীধৰ্মমনুপ্ৰপন্না

গতাগতং কামকামা লভন্তে ||৯-২১||

অনন্যাশ্চিন্তয়ন্তো মাং যে জনাঃ পৰ্যুপাসতে |

তেষাং নিত্যাভিয়ুক্তানাং যোগক্ষেমং ৱহাম্যহম্ ||৯-২২||

য়েঽপ্যন্যদেৱতা ভক্তা যজন্তে শ্ৰদ্ধয়ান্বিতাঃ |

তেঽপি মামেৱ কৌন্তেয় যজন্ত্যৱিধিপূৰ্বকম্ ||৯-২৩||

অহং হি সৰ্বযজ্ঞানাং ভোক্তা চ প্ৰভুৰেৱ চ |

ন তু মামভিজানন্তি তত্ত্বেনাতশ্চ্যৱন্তি তে ||৯-২৪||

যান্তি দেৱব্ৰতা দেৱান্পিতৃনযান্তি পিতৃব্ৰতাঃ |

ভূতানি যান্তি ভূতেজ্যা যান্তি মদ্যাজিনোঽপি মাম্ ||৯-২৫||

পত্ৰং পুষ্পং ফলং তোয়ং যো মে ভক্ত্যা প্ৰয়চ্ছতি |

তদহং ভক্ত্যুপহৃতমশ্নামি প্ৰয়তাত্মনঃ ||৯-২৬||

যৎকৰোষি যদশ্নাসি যজ্জুহোষি দদাসি যৎ |

যত্তপস্যসি কৌন্তেয় তৎকুৰুষ্ব মদৰ্পণম্ ||৯-২৭||

শুভাশুভফলৈৰেৱং মোক্ষ্যসে কৰ্মবন্ধনৈঃ |

সন্ন্যাসযোগযুক্তাত্মা ৱিমুক্তো মামুপৈষ্যসি ||৯-২৮||

সমোঽহং সৰ্বভূতেষু ন মে দ্বেষ্যোঽস্তি ন প্ৰিয়ঃ |

য়ে ভজন্তি তু মাং ভক্ত্যা ময়ি তে তেষু চাপ্যহম্ ||৯-২৯||

অপি চেৎসুদুৰাচাৰো ভজতে মামনন্যভাক্ |

সাধুৰেৱ স মন্তব্যঃ সম্যগব্যৱসিতো হি সঃ ||৯-৩০||

ক্ষিপ্ৰং ভৱতি ধৰ্মাত্মা শশ্বচ্ছান্তিং নিগচ্ছতি |

কৌন্তেয় প্ৰতিজানীহি ন মে ভক্তঃ প্ৰণশ্যতি ||৯-৩১||

মাং হি পাৰ্থ ৱ্যপাশ্ৰিত্য যেঽপি স্যুঃ পাপযোনয়ঃ |

স্ত্ৰিয়ো বৈশ্যাস্তথা শূদ্ৰাস্তেঽপি যান্তি পৰাং গতিম্ ||৯-৩২||

কিং পুনৰ্ব্ৰাহ্মণাঃ পুণ্যা ভক্তা ৰাজৰ্ষয়স্তথা |

অনিত্যমসুখং লোকমিমং প্ৰাপ্য ভজস্ব মাম্ ||৯-৩৩||

মন্মনা ভৱ মদ্ভক্তো মদ্যাজী মাং নমস্কুৰু |

মামৈৱৈষ্যসি যুক্ত্বৈৱমাত্মানং মৎপৰায়ণঃ ||৯-৩৪||