দৈবাসুৰসম্পদ্বিভাগযোগ

শ্ৰীভগৱানুবাচ |

অভয়ং সত্ত্বসংশুদ্ধিৰ্জ্ঞানযোগব্যৱস্থিতিঃ |

দানং দমশ্চ যজ্ঞশ্চ স্বাধ্যায়স্তপ আৰ্জৱম্ ||১৬-১||

অহিংসা সত্যমক্ৰোধস্ত্যাগঃ শান্তিপৈশুনম্ |

দয়া ভূতেষ্বলোলুপ্ত্বং মাৰ্দৱং হ্ৰীৰচাপলম্ ||১৬-২||

তেজঃ ক্ষমা ধৃতিঃ শৌচমদ্ৰোহো নাতিমানিতা |

ভৱন্তি সম্পদং দৈৱীমভিজাতস্য ভাৰত ||১৬-৩||

দম্ভো দৰ্পোহভিমানশ্চ ক্ৰোধঃ পাৰুষ্যমেৱ চ |

অজ্ঞানং চাভিজাতস্য পাৰ্থ সম্পদমাসুৰীম ||১৬-৪||

দৈৱী সম্পদ্বিমোক্ষায় নিবন্ধায়াসুৰী মতা |

মা শুচঃ সম্পদং দৈৱীমভিজাতোহসি পাণ্ডৱ ||১৬-৫||

দ্বৌ ভূতসৰ্গৌ লোকেঽস্মিন্দৈৱ আসুৰ এৱ চ |

দৈৱো বিস্তৰশঃ প্ৰোক্ত আসুৰং পাৰ্থ মে শৃণু ||১৬-৬||

প্ৰবৃত্তিঞ্চ নিবৃত্তিঞ্চ জনা ন বিদুৰাসুৰাঃ |

ন শৌচং নাপি চাচাৰো ন সত্যং তেষু বিদ্যতে ||১৬-৭||

অসত্যমপ্ৰতিষ্ঠং তে জগদাহুৰনীশ্বৰম্ |

অপৰস্পৰসম্ভূতং কিমন্যৎকামহৈতুকম্ ||১৬-৮||

এতাং দৃষ্টিমৱষ্টভ্য নষ্টাত্মানোঽল্পবুদ্ধয়ঃ |

প্ৰভৱন্ত্যুগ্ৰকৰ্মাণঃ ক্ষয়ায় জগতোঽহিতাঃ ||১৬-৯||

কামমাশ্ৰিত্য দুষ্পূৰং দম্ভমানমদান্বিতাঃ |

মোহাদ্গৃহীত্ৱাসদ্গ্ৰাহানপ্ৰৱৰ্তন্তেঽশুচিৱ্ৰতাঃ ||১৬-১০||

চিন্তামপৰিমেয়াঞ্চ প্ৰলয়ান্তামুপাশ্ৰিতাঃ |

কামোপভোগপৰমা এতাৱদিতি নিশ্চিতাঃ ||১৬-১১||

আশাপাশশতৈৰ্বদ্ধাঃ কামক্ৰোধপৰায়ণাঃ |

ঈহন্তে কামভোগাৰ্থমন্যায়েনাৰ্থসঞ্চয়ান্ ||১৬-১২||

ইদমদ্য ময়া লব্ধমিমং প্ৰাপ্স্যে মনোৰথম্ |

ইদমস্তীদপিম মে ভৱিষ্যতি পুনৰ্ধনম্ ||১৬-১৩||

অসৌ ময়া হতঃ শত্ৰুৰ্হনিষ্যে চাপৰানপি |

ঈশ্বৰোহমহমহং ভোগী সিদ্ধোহহং বলৱান্সুখী ||১৬-১৪||

আঢ্যোহভিজানৱানস্মি কোঽন্যোহস্তি সদৃশো ময়া |

যজ্ঞ্যে দাস্যামি মোদিষ্য ইত্যজ্ঞানৱিমোহিতাঃ ||১৬-১৫||

অনেকচিত্তবিভ্ৰান্তা মোহজালসমাবৃতাঃ |

প্ৰসক্তাঃ কামভোগেষু পতন্তি নৰকেঽশুচৌ ||১৬-১৬||

আত্মসম্ভাৱিতাঃ স্তব্ধা ধনমানমদান্বিতাঃ |

যজন্তে নামযজ্ঞৈস্তে দম্ভেনাবিধিপূৰ্বকম্ ||১৬-১৭||

অহংকাৰং বলং দৰ্পং কামং ক্ৰোধঞ্চ সংশ্ৰিতাঃ |

মামাত্মপৰদেহেষু প্ৰদ্বিষন্তোহভ্যসূয়কাঃ ||১৬-১৮||

তানহং দ্বিষতঃ ক্ৰুৰান্সংসাৰেষু নৰাধমান্ |

ক্ষিপাম্যজস্ৰমশুভানাসুৰীষ্ৱেৱ যোনিষু ||১৬-১৯||

আসুৰীং যোনিমাপন্না মূঢ়া জন্মনি জন্মনি |

মামপ্ৰাপ্যৈৱ কৌন্তেয় ততো যান্ত্যধমাং গতিম্ ||১৬-২০||

ত্ৰিৱিধং নৰকস্যেদং দ্বাৰং নাশনমাত্মনঃ |

কামঃ ক্ৰোধস্তথা লোভস্তস্মাদেতত্ৰয়ং ত্যজেৎ ||১৬-২১||

এতৈৰ্বিমুক্তঃ কৌন্তেয় তমোদ্বাৰৈস্ত্ৰিভিৰ্নৰঃ |

আচৰত্যাত্মনঃ শ্ৰেয়স্ততো যাতি পৰাং গতিম্ ||১৬-২২||

য়ঃ শাস্ত্ৰৱিধিমুত্সৃজ্য বৰ্ততে কামকাৰতঃ |

ন স সিদ্ধিমৱাপ্নোতি ন সুখং ন পৰাং গতিম্ ||১৬-২৩||

তস্মাচ্ছাস্ত্ৰং প্ৰমাণং তে কাৰ্যাকৰ্যৱ্যৱস্থিতৌ |

জ্ঞাত্ৱা শাস্ত্ৰৱিধানোক্তং কৰ্ম কৰ্তুমিহাৰ্হসি ||১৬-২৪||