ভক্তিযোগ

অৰ্জুন উবাচ |

এৱং সততযুক্তা যে ভক্তাস্ত্ৱাং পৰ্যুপাসতে |

যে চাপ্যক্ষৰমব্যক্তং তেষাং কে যোগৱিত্তমাঃ ||১২-১||

শ্ৰীভগৱানুবাচ |

ময়্যাৱেশ্য মনো যে মাং নিত্যযুক্তা উপাসতে |

শ্ৰদ্ধয়া পৰয়োপেতাঃ তে মে যুক্ততমা মতাঃ ||১২-২||

যে ত্ৱক্ষৰমনির্দেশ্যমব্যক্তং পৰ্যুপাসতে |

সৰ্বত্ৰগমচিন্ত্যঞ্চ কূটস্থমচলন্ধ্ৰুৱম্ ||১২-৩||

সন্নিয়ম্যেন্দ্ৰিয়গ্ৰামং সৰ্বত্ৰ সমবুদ্ধয়ঃ |

তে প্ৰাপ্নুৱন্তি মামেৱ সৰ্বভূতহিতে ৰতাঃ ||১২-৪||

ক্লেশোঽধিকতৰস্তেষামব্যক্তাসক্তচেতসাম্ |

অব্যক্তা হি গতিৰ্দুঃখং দেহৱদ্ভিবৰাপ্যতে ||১২-৫||

যে তু সৰ্বাণি কৰ্মাণি ময়ি সন্নস্য মৎপৰঃ |

অনন্যেনৈৱ যোগেন মাং ধ্যায়ন্ত উপাসতে ||১২-৬||

তেষামহং সমুদ্ধৰ্তা মৃত্যুসংসাৰসাগৰাৎ |

ভৱামি নচিৰাৎপাৰ্থ ময়্যাৱেশিতচেতসাম্ ||১২-৭||

ময়্যেৱ মন আধাৎস্ব ময়ি বুদ্ধিং নিৱেশয় |

নিৱসিষ্যসি ময়্যেৱ অত ঊৰ্ধ্বং ন সংশয়ঃ ||১২-৮||

অথ চিত্তং সমাধাতুং ন শক্নোষি ময়ি স্থিৰম্ |

অভ্যাসযোগেন ততো মামিচ্ছাপ্তুং ধনঞ্জয় ||১২-৯||

অভ্যাসেঽপ্যসমর্থোঽসি মৎকৰ্মপৰমো ভৱ |

মদৰ্থমপি কৰ্মাণি কুৰ্ৱন্সিদ্ধিমৱাপ্স্যসি ||১২-১০||

অথৈতদপ্যশক্তোঽসি কৰ্তুং মদ্যোগমাশ্ৰিতঃ |

সৰ্বকর্মফলত্যাগং ততঃ কুৰু যতাত্মৱান্ ||১২-১১||

শ্ৰেয়ো হি জ্ঞানমভ্যাসাৎজ্ঞানাদ্ধ্যানং বিশিষ্যতে |

ধ্যানাৎকৰ্মফলত্যাগস্ত্যাগাচ্ছান্তিনৰনন্তৰম্ ||১২-১২||

অদ্ৱেষ্টা সৰ্বভূতানাং মৈত্ৰঃ কৰুণ এৱ চ |

নিৰ্মমো নিৰহঙ্কাৰঃ সমদুঃখসুখঃ ক্ষমী ||১২-১৩||

সন্তুষ্টঃ সততং যোগী যতাত্মা দৃঢ়নিশ্চয়ঃ |

ময়্যৰ্পিতমনোবুদ্ধিৰ্যো মদ্ভক্তঃ স মে প্ৰিয়ঃ ||১২-১৪||

যস্মান্নোদ্ৱিজতে লোকো লোকান্নোদ্ৱিজতে চ যঃ |

হৰ্ষামৰ্ষভয়োদ্ৱেগৈৰ্মুক্তো যঃ স চ মে প্ৰিয়ঃ ||১২-১৫||

অনপেক্ষঃ শুচিৰ্দক্ষ উদাসীনো গতব্যথঃ |

সৰ্বাৰম্ভপৰিত্যাগী যো মদ্ভক্তঃ স মে প্ৰিয়ঃ ||১২-১৬||

যো ন হৃষ্যতি ন দ্বেষ্টি ন শোচতি ন কাঙ্ক্ষতি |

শুভাশুভপৰিত্যাগী ভক্তিমান্যঃ স মে প্ৰিয়ঃ ||১২-১৭||

সমঃ শত্ৰৌ চ মিত্ৰে চ তথা মানাপমানয়োঃ |

শীতোষ্ণসুখদুঃখেষু সমঃ সঙ্গৱিৱৰ্জিতঃ ||১২-১৮||

তুল্যনিন্দাস্তুতিৰ্মৌনী সন্তুষ্টো যেন কেনচিৎ |

অনিকেতঃ স্থিৰমতিৰ্ভক্তিমান্মে প্ৰিয়ো নৰঃ ||১২-১৯||

যে তু ধৰ্ম্যামৃতমিদং যথোক্তং পৰ্যুপাসতে |

শ্ৰদ্দধানা মৎপৰমা ভক্তাস্তেঽতীব মে প্ৰিয়াঃ ||১২-২০||